خريطة ذهنية للنظام المالي للشركات التجارية
للمصانع
*حضرتك كمدير مالي لازم كل يوم الصبح تبقي مخطط الاسبوع ده او الشهر ده او السنة دي احنا هدفنا ايه و احنا عملنا منه ايه و فاضل قد ايه عشان نوصله؟
* هنبص النهاردة علي شغل مين و هتربط بينه و بين القسم / الإدارة/ القطاع ( علي حسب حجم نشاطك) الثاني ازاي؟
*نتيجة كل قسم مسمعة في الثاني صح و لا في فاقد ولا في حاجة مش مظبوطة
*دورة التشغيل ماشية زي ما انت كنت راسم و لا كل واحد ماشي في حاله
* ما تنساش أن أهم إدارة عندك إدارة التشغيل و الصيانة لأنها بتمثل الأصول ( سواء خط انتاج أو بضاعة في مخزن) هي اللي بتدر عليك تدفق نقدي و لو محصلش كدة يبقي انت في عالم تاني 🤣🤣🤣🚀
*صيانة الأصول من أهم المصروفات اللي لازم تحط لها ميزانية محترمة عشان تاني لو الأصول عطلت مش هنلاقي حاجة نبيعها
*دراسة السوق لازم تكون من حديد ، عارفين موقعنا و حصتنا في السوق مش شغالين بالبركة ، عارفين الشريحة المستهدفة ، عارفين كمية البيع او علي الاقل قيمة المبيعات اللي تغطي مصاريفنا الثابتة و عشان نعرف هنكسب كام امتي ؟ ( تحليل التعادل)
* ما ينفعش تبيع لكل الناس ، استهدف صح تقلل فاقد نفقات التسويق أو تركز في المكان الصح فتبقي صرفت صح لان التسويق مصاريفه عاليه بس مهمة جدا جدا جدا ، جذب العميل و استقطابه بمبلغ و قدره ( بحوث تسويقيه) و الحفاظ عليه اصعب و اصعب ( قياس رضا العميل و الحفاظ عليه)
* اتعلمنا في الجودة أن مراقب الجودة ابو مرتب ٢٠٠٠٠ في الشهر بيوفر علينا مصاريف إرضاء عميل بتوصل ل ٥٠٠ الف ،لان لو منتج غير مراقب و طلع لا قدر الله فاسد و نزل لتاجر الجملة و التجزئة و وصل لايد العميل هنا الكارثة ونشر بقي أنه منتجنا مش تمام بالصوت و الصورة و ساعتها هتشيل هتشيل ، هتخسر سمعة و حصة من السوق و هتدفع اكتر عشان تعرف ترجع تاني و تنسي العملاء الحادثة دي
* في ظروف السوق اللي احنا فيها بلاش تلعب لعبة الاجل لأنها فلوس بترميها و عقبال ما تلمها تاني هتكون فقدت قيمتها و ربحها ( قيمة الربح الشرائية) بقت صفر
*البيع النقدي القليل بربح بسيط جدا و دوران سريع ( حط تحتها مائة خط ) احسن من الاجل ، خليك فاكر الكاش احسن
* العنصر البشري يعني كفاءات / خبرات/ مشاعر / أهواء/ علاقات إنسانية / تنمية/ وعشان تعرف تقيس ده ماليا محتاج تكون فاهم موارد بشرية عشان انت كمدير مالي ما تعترضش علي تكاليف الحاجات دي و تتفه منها لان التكاليف دي بتحفز العنصر البشري علي أنه يعطيك كل طاقته برضاه و ساعتها هتحصل علي جودة و اتقان و كفاءة و فاعلية
* تكاليف الموارد البشرية من أهم و اكثر النفقات حساسية ومالهاش معايير لان مش كل البشر زي بعض لا الاونر زي اونر تاني ولا المورد البشري زي التاني كل شخص وله أفكاره و قدراته و خبراته و ظروفه فيتم الالتزام بلائحة العمل المتفق عليها العامة و نترك روح الاونر تحكم في باقي التكاليف
* اتعلمنا في السوق نقطة خطيرة جدا ( احفظ المال بالمال) يعني الأمين علي عهدة أو بضاعة أو سر لازم تكون عينه مليانة من الحاجة اللي بيحرسها
* الماليات دي عشق العشق، هي الرقيب / المؤشر / الدليل / التارجت اللي كلنا بنمشي عليه
* ناس رخمة و معقدة بس مفتاح الامان للاونر و حافظ اسراره، لان في رقبتنا أمانة رأس مال الاونر
* الماليات بتراقب علي كل الأقسام لأنها هي اللي هتحدد كل قسم حقق و لا تجاوز و لا تهاون عن التارجت بتاعه اللي اتفق مع الاونر و الماليات عليه في أول السنة
* شخصية المحاسب لازم تملك صفات معينة عند التعيين الأمانة ، الرقابة ، التحليل ،الحنتفة، العين الملاحظة ، التربية السوية لان كل ده بينعكس علي ترجمته لأداء التشغيل و الصيانة أو التسويق أو الموارد البشرية او المال المتدفق
* المحاسبة في الاساس علم، بس كل علم لازم يتطعم بخبرات حياتية و كمان كل نشاط و ليه تكاته
* لازم المحاسب يكون فاهم كويس جدا دورة التشغيل و التخزين و البيع و المردودات من الالف للياء ،
* المحاسب المطلع علي كل جديد هيريح نفسه و هيحافظ علي مكانته في النشاط ، لان دورك ترجمة كل الأعمال الفنية و البيعية و الإدارية الي مالية و عرضها بطريقة يفهمها الاونر الغير متخصص ، ((( ده دورنا ))) ، ما تقولش اونر غبي مش بيفهم حسابات أو تكاليف ، هو ماله ، الراجل ده مستثمر أو تاجر بيفهم في المجال بحكم الخبرة أو وارثه عن اهله و عنده معايير نجاح معينه علينا كماليين أننا نوصله للأرقام اللي هيعرف يقيس بيها نجاحه غير كدة احنا فشلنا و ما نستحقش مرتبنا و في الغالب هتمشي
* العلم أساس المحاسبة ، المعايير المصرية أساس العمل و كل نشاط بيتطبع علي المعايير لأن المعايير اتعملت مناسبة لكل الانشطة
*التقارير المالية فيها مهارة عرض اكثر منها علم
* اظبط نماذج جمع معلومات التكلفة و اشرحها بكل بساطة للفنيين و الاداريين و لما تكتشف خطأ حاول تصلح قبل ما تجازي ولو مفيش استجابة للتصويب توكل علي الله و قوم بدورك الرقابي و ما تفتكرش انك كدة مؤذي انت كدة بتقوم بدورك
* يجب شرح اسباب التفوق علي التارجت بهدف التفوق أكثر و أكثر
* يجب شرح اسباب عدم تحقيق التارجت بكل ظروفه المالية و البشرية و ظروف السوق و إمكانيات النشاط و قدرات العاملين للوقوف الحقيقي علي سبب التقصير ( محاسبة إدارية)
*اسف جدا علي الإطالة ، بس حبيت افهم الناس يعني ايه مدير مالي
*اصل الموضوع مش شوية ارقام بتتجمع
#فيتامينات_محاسبية_مع_اكرم_ممدوح
#فيتامين_محاسبة
رائع
شهادة اعتز بها يا استاذنا
اشكرك يا استاذنا ، الحمد لله
بالتوفيق دائما
معلومات مفيدة
اشكرك ، نستمر بدعمكم دائما
الحمد لله ، اسعي دائما لإرضاء رغبات القراء