بدأت قصتي مع العلاج الوظيفي بعد ما إسلتمت شهادة الثانوية و كنت عايم شو التخصص اللي بدي أفوتو و كنت عامل قلق بكل البيت هسه بعد أنا إستلمت نتيجة الثانوية ولا شك بأنني كنت محبط نوعاً من المعدل الذي تخرجت به ، و لكن لم أستسلم ذهبت ، وأخذت جولة على كليات غزة لإنه معدلي كان أقل من ٦٥% و هذا يعني لازم أدرس دبلوم متوسط و بعدها بجسر ، المهم يا سادة لفيت دورت كنت عاشق للتمريض و التخصصات الطبية ولكن لم يحالفني الحظ ، فكرت أدرس دبلوم تمريض ، بس ما كنت مقتنع فيه و ما حد شجعني عليه ، فكرت بالعلاج الطبيعي بس ما بنفع لاني أدبي و النقابة ما بتعترف بالأدبي ، بعد حيرة من أمري ، ذهبت و دفعت رسوم مقعد في جامعة فلسطين و سجلت تمريض
بس بعد أسبوع رحت وسحبت ملفي وخسرت ال٢٠ دينار صح أعطوني شنتة بس كبيرها ٤٠ ل ٥٠ شيقل ، بس مش مشكلة أهو بنغلط و بنتعلم ، ف رحت على كلية مجتمع الأقصى و دفعت حجز مقعد و سجلت علاج وظيفي و في الوقت هذا أقسم لكم ما كنت بعرف شو يعني علاج وظيفي ، بس كانت أخويا الكبير ، بعد كم يوم إجاني مسج مبارك تم قبولك في تخصص العلاج الوظيفي ، رحت زي الأسد دفعت و نظلت ١٨ ساعة ، و بلشت و بلش هالحلم يكبر و نا لحتى الأن ما بعرف شو يعني علاج وظيفي بلشت المحاضرات و بلش حبيبي الدكتور محمد السحار أبو أحمد رحمة الله عليه ينصحنا و يحفزنا و للعلم كنا أول دفعت شباب بعد إنقطاع قرابة ٥ سنوات ، الحلم بلش يكبر ، الصورة بلشت توضح ، بلش الجد بس ....
هان صارت نقلة للأسوء ، بطلت أحضر محاضرات ، بطلت مهتم ، بطلت أتابع ، بطلت أدور ، و أشتغلت في شركة ملهاش علاقة بكل التخصص وهذا كله صار في شهر ١٢ /٢٠١٨
و ضيعت ع حالي شغلات كثيرة ..
بس مش ندمان تعلمت شغلات كثيرة ، و مش ندمان لاني رجعت و اعرفت غلطي و صلحتوا كثير منيح ، كلنا بنغلط و كلنا ممكن ناخذ قرارات غلط ولكن لما نعرف إنها غلط لازم نصلحها و نرجع للمسار الصح .
و هون بلشت سنة جديدة معنويات جديدة همة قوية و الحمد لله قدرت أعوض إللي فات ...
في الأمتحانات ما كنت أهتم كثير لإني كنت مقتنع الدرجات بعمرهم ما كانوا مقياس للإبداع و التميز لدى الشخص .
وبهيك بكون إجى وقت التدريب الميداني ، في مكان مش هحكي شو هو لأسباب عدة بس ، بس كانو ٣ شهور رهيبة تعلمت فيهم شغلات كثيرة ، أفهمت العلاج الوظيفي على أصوله ، و أتعلمت و أتقنت الشغل مع مرضى الجلطات الدماغية و كتابة التقيمات وتعلمت كتابة التقارير الكيدية ، أتعلمت كيف أوشب المدير على زميلي اللي مش عاجبني .
ما علينا خلص التدريب و جبت فيه ٨٩ من ١٠٠ .
لاني كنت مزبط ملف الإنجاز. تاعي و شغاله شغل أبو راتب
و هيك خلص تدريب ١ و رجعنا للفصل الأول من السنة الثانية و أنشئت صفحة يوميات معالج وظيفي على فيسبوك وانستاغرام و بفضل لله إجى عام ٢٠٢٣ و صرنا عيلة كبيرة من مختلف الدول العربية و فخور فيكم كلكم و الله و بلشت أظهر إعلامياً و أبرز دورنا للمجتمع الغزي و العربي عامة و كان فصل ممتع و كنت منزل فيه المواد الدسمة skills و الPediatric و الإعاقة الجسدية و نزلت تدريب ٢ ، وهان كانت الصدمة لما نزلت تدريب في مكان فيه شيء إلا مقومات قسم العلاج الوظيفي و المكان متهالك وقديم و فش فيه شيء صالح غير الحديقة و فرد السليكون ، بس ربنا كان مكرمني بزملاء لطفاء جداً ، صح كان يصير ططشات بس بحبهم جداً ، و هان بلش الجد بدنا نعمل شيء من الاشيء
طلبنا سليكون و أصابع شمع ، و شحدنا شوية كراتين و ولقينا شوية فوم كان معموم هاشتغات ، و كان في خشب قديم أخذناه ، وسرقت مقص إمي و قطن إزالة الميكاب من عندها
بلشنا نشتغل ، ونعمل شوية أدوات وأنشطة نمشي حالنا فيها
من كثر ما كنت أشتغل بفرد السليكون ، الزملاء حبايبي سموني محمود سيلكون ، ما علينا من هالموضوع و أستمرت هالفترة و خلصت المدة بخير و سلامة و أخذت بالمادة أكثر واحد ٩٥
كيف وليش بعرفش ، وبعدها يا أجاويد إجت كورونا ٢٠٢٠ و سكرت البلد و الوضع صار كرب و نزلت الفصل الرابع أونلاين
و هون المواد الدسمة إللي ضلت ضعنا فيها .
بس الدكاترة و الله ما قصروا نزلوا محاضرات و زبطوا الوضع
و خلص الفصل بسلام و أخذت إفادة خريج وتخرجت بمعدل ٧١ % هتحكولي لي ما طلعت الشهادة هحكيلكم لإنه كان عليا ٦٨٠ دينار أردني للكلية رسوم مستحقة و ١٠٠ شيقل .
بعدها الدنيا فتحت شوية و حبيت أشتغل مثلي مثل أي خريج بس للأسف ما زبط الوضع لانه فش خبرة فش مزاولة و هحكيلكم سالفة المزاولة كمان شوية .
رحت على إحدى الجمعيات المهتمة بذوي الإعاقة و إتفقت معهم على إنشاء حاضنة لخريجي العلاج الوظيفي لاني انا ما كنت ملاقي حاضنة ، هون تنطبق مقولة فاقد الشيء يعطيه و بقوة .
بفضل الله اشتغلنا ع هذا الموضوع وشكلنا حاضنة و كانت كنشاط داخلي للجمعية نفذنا أنشطة حلوة جمعتنا و تبادلنا أفكار ، شجعنا بعض ، حتى نقدر نكمل هالمشوار و للأسف بعد فترة وجيزة الجمعية سكرت لظروف خاصة فيها وما قدرت أكمل هالفكرة .
هون سكرت الدنيا في وجهي ، رحت أقدم تطوع وما حد قبلني و إترفضت ٣ مرات لانه ما كان معي خبرة عملية بس ما يئست و كملت صح وصلت في الفكرة إني أترك العلاج الوظيفي و أروح أشتغل كاشير بسوبر ماركت ، بس الحمد لله إنه هالشيء ما صار و كملت مسيرتي في العلاج الوظيفي حتى أتيحت لي الفرصة في نهاية شهر ٢/٢٠٢١ بالتدريب و ليس تطوع في إحدى المؤسسات و هذا لإني ما كنت حاصل على مزاولة مهنة .
قعدت في هالمؤسسة ٩ شهور أشتغل بدون راتب هتحكولي ليش حرام عليك ، تعبك ، جهدك ، فلوسك ، أجار الطريق
بحب أحكيلكم انه ما كنت مهتم إلا إنه أضل متمسك بالفرصة إللي تخليني موجود في هالتخصص ، صح تعرضت لكثير مواقف سيئة بس ما إستسلمت و بعد هيك أخذت إجازة شهر ، راجعت حساباتي و تقديراتي و قررت أرجع أكمل بس رجعت وكان في بدل مواصلات فقط .
في الفترة هاي اجى مشروع للمؤسسة وجابو أخصائيين من برا و ما أخذوني تضايقت بس ما يئيست وكملت و بفصل ربنا بعد شهرين إجى مشروع ثاني و الراتب كان ضعفين الراتب تاع المشروع الأول و كان عوض صبري خير و كبير
و هسه أنا مشرف قسم العلاج الوظيفي في المؤسسة .
في شهر ٨/٢٠٢٢ برفقة الزميل أبو العباس تم إستكمال فكرتي و البدء فيها برونق جميل و هي نادي العلاج الوظيفي الذي يشكل حاضنة عربية لطلبة وخريجي العلاج الوظيفي في الدول العربية و فخور بكونه معنا ٢٠٠ طالب و خريج .
و إهتميت في تقديم الدورات التدريبية و ورشات العمل للطلبة الجدد و الخريجين و بحاول جاهداً تكون بشكل مجاني قدر الإمكان و ربنا يقدرني و أكون عند حسن ظن الجميع .
اه أوشكت أنسى موضوع المزاولة يا حبايبي مش صعب بس بده شوية تعب في الدراسة و إعتمدوا الفهم مش الحفظ .
صح انا رسبت اول مرة و نقص عليا ٣ علامات جبت ٥٧ من ١٠٠ بس ما نجحوني و عادي عدت كمان مرة و نجحت وجبت علامة جيدة نوعاً و بعد كم شهر طلعت شهادة الجامعة و طلعت شهادة المزاولة و حققت أول حلم لي في بداية ٢٠٢٣ و هو مشروع خاص و هو خدمة العلاج الوظيفي المنزلية و جهزت أدوات و معدات من النوع العالي بفضل ربنا و بعنادي و شغفي وحبي للمشروع هذا من زمان و هيني بقول يارب .
و كل إللي إنتوا بتشوفني فيه حالياً هو حصاد تعب وجهد و عناد ٥ سنوات ، ربنا ما خيبني و أكرمني على قد نيتي الطيبة
و هذا كله بفضل الله عز وجل و بفضل دعوات أمي أبي ♡
فائق حبي و إمتناني لكم زملاء المهنة
سرد رائع للقصة
كل الحب و المودة أستاذ حسن
وفقك الله لمة يحب ويرضى يارب .
اللهم أمين و إياكم 🫶
قصة نجاح حيث أن الاستمرار وعدم الاستسلام وكسر الحواجز والعقبات للوصول للهدف المنشود 🎯
د.هاني آل غزوي
فائق حبي و احترامي
امنيات التوفيق
موضوع ملفت ومبهر ...وغير ذلك محفز
💐👍
قصة معبرة و محفزة
بالتوفيق الدائم في مسيرتك المهنية 🙏
قصة معبرة
كل الإحترام ليالي