كيف تقيس خبرة المحاسب؟

ما الفرق بين محاسب خبرة سنة و سنتين و ثلاثة ؟

بص يا صديقي

هي مش بالسنين ، انت لو ذاكرت مهارات المحاسبة كلها في سنة أصبح عندك خبرة ٥ سنوات، تعالي بقي نستعرض مهارات المحاسب

١- مهارات التسجيل المحاسبي ( مدخل البيانات) اللي بتتعلم فيها اساسيات المحاسبة و مبادئها و فروضها وانواع الحسابات والدليل المحاسبي و كيفية تسجيل المستندات ،

المشكلة في المهارة دي أنها بتطول أو علي حسب استيعابك لان كل قسم و ليه طريقة تسجيل

عندك المبيعات

ثم العملاء

ثم الموردون

ثم المخازن

ثم الخزينة

ثم البنوك

ثم الأجور

ثم المصروفات

ثم الأصول

ثم الالتزامات و رأس المال

و لما تتعلم كل ده هتدخل علي اعداد القيد المحاسبي و اليومية الامريكية و بعدها ميزان المراجعة ،

الكلام لو انت في شركة أكثر من ٣٠٠ فرد انما لو نشاط بسيط مش هتلاقي المراحل دي كلها و هتعمل كل ده في وقت واحد بس طبعا مش بخبرة و لا نفس حالات بتاع الشركة 

٢- مهارة المحاسبة المالية: هنا بقي هتتعلم المعايير المحاسبية و ازاي تعرف تعمل قوائم مالية وتعرض تقارير أولها ميزان المراجعة و تبدأ تقرأ في المعايير و تعرف الحالات الصعبة بتاعة توجيه القيد المحاسبي و الافضل لنشاطك ازاي تعرف تطلعه ربحان مش خسران أو ربحان أكثر ،

ازاي تعمل القوائم بشكل مطابق للمعايير مش زي الشكل العادي و ايه يظهر قبل مين و ليه و المقارنة

وتتعلم بقي باقي التقارير الخاصة بمخرجات التسجيل المحاسبي اجمالي الحسابات ، مذكرة تسوية البنك، اجمالي الفروع

٣- مهارات المحاسبة الإدارية: 

دي الفنون القتالية بتاعة المحاسبة ،

ازاي تعرف تضرب منافسك في مقتل و عشان توصل للمرحلة دي لازم تكون عارف

كل نقاط ضعفك انت

و قوتك انت

و تعظم قوتك

و تعالج ضعفك

عن طريق مؤشرات و معادلات اكيد درستها في الكلية بنفس اسم المادة 

الجزء الثاني منها اعداد الموازنات سواء كان اعداد موازنة انتاج أو مبيعات أو أو وده معناه التخطيط لفترة قادمة مع مراعاة كل الظروف مش المحاسبية بس ، لا تراعي الظروف الاقتصادية للبلاد وقوانينها و الاحداث المتوقعة و سياسة البيع 

٤- مهارة المحاسبة الضريبية

و دي مهارة من حلاوتها أنها متقسمة يعني هتلاقيها في المبيعات شوية و في المخازن شوية في الأصول شوية و في الأجور شويات وفي الموردين شوية و في العملاء شوية

فمحتاج تعدي علي كل البنود عشان تتعلمها كلها و بعد كدة تعرف تعمل إقرار ضريبة علي الدخل اللي اصلا بيعمله المحاسب القانوني فعشان توصل للمحاسب القانوني بتاع نشاط و يسمحلك تتعلمه في كتير من الثقة و الاطمئنان

احسب انت بقى تعرف تتعلم قد ايه في كام سنة و يفضل طبعا انك تلف بنفسك علي الاماكن دي 

#مهارات_المحاسب_الفريش