ما هي مهام مجاسب المطاعم؟

مهام محاسب المطعم 

أولا حصر الايردات :

- زي اي محاسب لازم تعرف أنواع ايراداتك ومصادرها:

 مطبخ وجبات خارجية

 مطعم وجبات داخلية

 مشروبات خارجية وداخلية

 وتقسمها بقى لفئات:

• عملاء كاش 

• وعملاء وجبات جماعية 

• وشيفت صباحي 

• وشيفت مسائي 

 وكمان تقسم الإيراد حسب نوع الاكل:

• (مشويات، سخن، بارد، حلويات، طواجن، وهكذا 

 عشان تعرف تعمل تقارير:

• اعلي / اقل مجموعة /صنف مبيعات

• اعلي / اقل مجموعة/ صنف ربحية

• اعلي / اقل عملاء مبيعات / ربحية

• اعلي مركز تكلفة (صالة – دليفري – تجاري – توريدات) مبيعات / ربحية 

• ما تنساش تقارن مبيعات الشهرية علي مدار العام 

ثانيا حصر مصاريف:

- يجب تحديد وحصر تكلفة كل نوع إيراد من اللي فوق دول عن طريق تجميع أطراف معادلة الريسيبي (مكونات) كل وجبة على حدي وده الادق أو لكل نوع فئة اكل و ده العادي، 

- الريسيبي ده بقي قصة وخبرة عمر وشقي وفي ناس بتبيع مكونات كل وجبة بالجرام ب 200000 جنيه لمجرد أنك تبقى عارف مكونات كل وجبة وكل مشروب فتقدر تحكم السيطرة على الشيف والكافيه والمطعم 

- نصيحة اوعي تأكل من أي وجبة يعرضها عليك غير رسمية لأنك بكدة كتبت اول سطر في شهادة فقد ثقة صاحب المكان فيك

وده ينقلنا للجزء الثالث الجرد والمخزون:

- حط في بالك لازم جرد الأصناف يوميا والاصح كل شيفت 

- لازم كمحاسب تحضر تسليم الأصناف للمخزن لضمان عدم تلاعب الشيف مع أمين المخزن في سرقة اي أصناف يا اما تكون مركب كاميرات في مكان واضح أثناء التسليم للمراجعة في وقت لاحق على فاتورة الشراء

- اللي يشتري حد تاني غير امين المخزن لضمان عدم التلاعب في أرصدة الموردين

- مخزنك بيبقى مقسم على 3 أماكن:

o مخزن إنتاج غير تام (البدروم) 

o مخزن تحت التصنيع (المطبخ) 

o مخزن بضاعة تامة الصنع (الثلاجات) 

- في المطاعم والكافيهات لازم تشتغل بسياسة المنصرف بالمتوسط المرجح عشان يبقي عندك تحديث لحظي بالتكلفة وقيمة رصيد المخزون 

- و تراقب الصلاحية بشيت اكسيل خارجي لو السيستم مش بيوفر الحتة دي

الجزء الرابع: باقي المصاريف

- ودي هتقسمها:

o لأجور (فئات واقسام)

o مصروفات عمومية:

 صيانة

 تليفون

 كهرباء

 نت

 تسويق

 دعاية 

 أدوات كتابية ومطبوعات

 غرامات

o باقي المصاريف لازم تكون تفصيليه لانك هتقسمها علي مراكز التكلفة اللي فتحتها في المبيعات 

الجزء الأخير وهي التقارير:

- تقارير المبيعات ودي اتكلمنا عليها 

- تقاير المصاريف وفي منها العام (بالاجماليات) و منها التحليلي

- تقارير المصاريف التحليلية لازم تتعرض علي مستوي مراكز التكلفة يعني مصاريف الصالة / الدليفري / الإدارة / المخازن و الثلاجات / المطبخ / المطعم 

- ونيجي بقي للأهم تقارير الربحية علي مستوي مراكز التكلفة بتجمع مبيعات و مصاريف مركز التكلفة كل علي حدي، طب ليه عشان تقسمها علي عدد الوحدات المباعة و تطلع بمتوسط ربحية الوحدة في مركز التكلفة وتطلع بربحية كل مكان او كل قسم في العموم

- تقارير الريسيبي والتسعير ودي لازم تكون محدثة بعد نهاية كل شهر بحيث:

o انك بتعمل تكلفة مبدئية و تسعير مبدئي للبيع حسب متوسط السوق 

o وبعد نهاية الشهر بتراجع نفسك تاني بعد التكاليف الفعلية 

o وبتعرض علي الاونر تقارير بالفرق بين التسعير المبدئي والفعلي علي مستوي الشهور وايه الميزة التنافسية اللي يقدر يخفض بيها السعر عن السوق مع الحفاظ علي نفس الجودة المبدئية 

o او ممكن يطلع التسعير المبدئي قليل وتحتاج ترفع سعر البيع

o ما تنساش تحليل التعادل للنشاط و تحليل التعادل للصنف بس ده محتاج منك تحليل تكاليف مباشرة و غ مباشرة / تكاليف ثابتة و تكاليف متغيرة وتكاليف اضافية

#فيتامين_محاسبة

#فيتامينات_محاسبية_مع_اكرم_ممدوح