مهام المحاسب في أي نشاط

مهام المحاسب في أي نشاط

 بغض النظر عن النشاط يا استاذي

المحاسب دوره حصر ايرادات الشركة ( الأصناف المباعة بمختلف تصنيفاتها و الخدمات المقدمة) و حصر تكلفتها ( شغل تكاليف في الغالب من تكلفة بضاعة و اجور و مصاريف تسويقية و متنوعة و هكذا) بكدة انت حققت مبدأ مقابلة الإيراد بالمصروف و طلعت صافي الربح ، كدة خلصت الإيراد و مصروفه

نيجي لرأس مال الشركة وصافيزالربح الناتج من ( ايراد - مصروف) و اي التزام عليها تجاه الغير ( من بنوك لو اخدت قرض او موردون لو اشتريت بالأجل او موظفين لو مش بتدفع الأجور اول باول و بتحجز جزء لزوم تحقيق التارجت او عليك ضرائب لسه ما دفعتهاش او معاشات مستقطعة من الموظفين ، و يقابله عملت ايه برأس المال و الديون اللي عليك جبت بيها أصول غير متداولة ( زي كأراضي و مباني وآلات و عربيات وأثاث و برامج و براءات اختراع و شهرة او لسه بتكون مشروع تحت التنفيذ و لم يعمل بعد) او اصول متداولة ( عملاء عن بيع اجل او عهد علي الموظفين او نقدية بالصندوق او ودائع بالبنك او رصيد جاري بالبنك)

بكدة تكون حققت جانب حقوق الملكية و الالتزامات و ما يقابلها من اصول 

، كل كلمة نطقتها في الفوق ده ممكن يبقي ليها محاسب واحد بيشتغلها و ده بيرجع لحجم الشركة اللي انت فيها بس ممكن محاسب يمسك كل ده لو حجم النشاط صغير ، لما تتخصص في اي كلمة من دول بتظهر تفاصيل و فنيات جميلة جدا و طريقة تعاملك مع المشاكل و متابعتك الدقيقة لكل رصيد بيظهر عندك و تتبعك لنمط السداد او التحصيل لكل تفصيلة هي الحاجات دي اللي بتخليك مميز عن الباقيين و لكن في النهاية لازم تبقي عارف انت موقعك فين من الأربع حسابات الرئيسية و التقارير الشهرية المطلوبة لكل حساب انت ماسكه و مفيش حاجة اسمها التقفيل و الميزانية شغلة مدير الحسابات ، مدير الحسابات وظيفته ادارة المحاسبين اللي معاه و توجييهم و المراجعة عليهم بخبرته 

#فيتامينات_محاسبية_مع_اكرم_ممدوح